دليل الكويت مقالات

مواضيع جولات - مدونة Pink Girl Q8 - Ocean View Hotel in Dubai تجربتي فندق أوشن فيو

Ocean View Hotel in Dubai تجربتي فندق أوشن فيو

IMG_4709
بسفرتي الاخيره لدبي كنت رايحه الجي بي ار ولفت نظري فندق اوشن فيو فقلت اذا الله كتب المره اليايه بسوي سيرج عنه واذا زين بحجز فيه
وفعلا لما حصلت لي سفره لدبي وكان خاطري بمكان قريب للبحر سويت سيرج ودخلت الموقع شفت الغرف كل شي يبشر بخير فحجزت عن طريق موقع بوكينج ٤ ليالي وطبعا يحجزون مبلغ معين لكن حطوا بالكم اذابتحجزون هذا مو السعر النهائي لانه في تاكس وسوالف جذي يزيد المبلغ بنسبه مو قليله والله خصوصا في دبي الكل ملاحظ هالشي

الفندق تلقونه تقريبا بنهايه شارع الجي بي ار

البوست طويل شوي بس علشان بحطكم بالصوره كامله واراويكم الفندق والشاطيء

IMG_4711
اللوبي مجكنم وفيه محل صغير وكافيه ومطعم
استقبالهم كان ممتاز وطلبت منهم الغرفه تكون جهة البحر ووقعت الاوراق وخذوا التأمين ٥٠٠ درهم واستلمت كروت الغرفه
DSC_0990
الغرفه كانت حلوه اثاث يديد ونظيف ومرتبه والوانها حلوه والسرير مريح والبرنده قعدتها حلوه
DSC_0993DSC_0995DSC_1000
المنظر من البرنده
DSC_0996
حمام السباحه
DSC_0998ccccccccDSC_0992
الريوق
IMG_4990
خوش مطعم عود ماشاء الله
IMG_4998
البوفيه مفتوح وكل خير الله فيه
IMG_4991IMG_4992IMG_4994IMG_4995IMG_4996
حمام السباحه والشاطيء
مع كرت الغرفه تلقون كرت خاص لعدة البحر
تسلمونها كشك صغير عند حمام السباحه ويعطونكم جنطه فيها فوطتين والقطعه اللي يفرشونها على الرمل مادري شسمها وشمسيه
واذا رديتوهم تستلمون الكرت مره ثانيه
DSC_1075
الحمام سباااحه نظيف جدا و مو عميق يعني نسبة العمق عاديه اللي فوق متر و ٦٥ لهم قيش :P
IMG_1638
بعض حمامات السباحه يمنعون اللي يلبسون مايوهات اسلاميه بحجة والله الملابس طويله بس الحمدلله عندهم محد تكلم والوضع طبيعي جدا
وسياستهم مثل كل هالاماكن اي ياهل اقل من ١٦ سنه لازم اهله معاه ولا مايدخل
IMG_1652
طبعا مراوح الماي موجوده وشغل عدل حتى حق اللي بيقعد بالمطعم الموجود على حمام السباحه
DSC_1088
وقت الغدا قلنا محنا طالعين وبنجرب اكلهم
طلبنا مقبلات شرقيه .. نتيييييفه بس لذيذ
وبيتزا مارغريتا كانت طيبه
DSC_1079IMG_1695
وهذا الفيو الليلي للمكان
DSC_1064DSC_1059DSC_1065
الشاطيء قريب من الفندق بس يبيله مشيه شويه لانه المنفذ اللي جدام الفندق مسكر قاعدين يسوون صيانه لبعض المباني
والحلو بالفندق انهم حاطين مصعد خاص من حمام السباحه تنزلين لي الشارع بدون لاتمرين باللوبي خوش شي
الشاطيء مرتب يهبل وكله مطاعم اشكال والالوان وبعض المحلات وسوبرماركت وسينما و واي فاي مجاني
IMG_4724
الحمامات مكرم السامع نظيفه
IMG_4713
الماي اينن والرمل نظيف مايعور الريل وماتحتاجون جوتي بحر كلش
DSC_1007IMG_4798DSC_1048IMG_4712IMG_4898
فرشنا شمسيتنا
IMG_4852IMG_1724IMG_1768
عيب الفندق انه مافيه خدمات على الشاطىء يعني لا ماي لا عصير لازم تشترون من هالمطاعم والماي ب٢٠ درهم تخيلوا
فحطوا في بالكم انكم تييبون كل شغلكم معاكم
الشركه اللي على الشاطىء توفر لكم سراير البحر وتقدرون تأجرونهم بقيمه ٥٠ درهم طول اليوم
IMG_1787
آخر ليله في الفندق ردينا من بره لقينا هالبطه الحلوه هديه وذكرى حلوه لاقامتنا فيه مع استبيان علشان يعرفون راينا بكل شي
IMG_2005
الفندق انصح فيه بصراحه نظافه ومعامله وترتيب
Ocean View Hotel in Dubai تجربتي فندق أوشن فيو
This entry was posted in Khaleejna (Gulf), Travel and tagged Dubai, hotel, Ocean View, sea, travel, uae, الامارات, بحر, دبي, سفر, فندق.

تعليقات
مشابهه لـ Ocean View Hotel in Dubai تجربتي فندق أوشن فيو